Ishlash jarayonida ruhiy salomatlikni saqlashning 10 usuli

Hayot yumushlarga to‘la. Kimdir kuniga to‘qqiz soat ishlaydi, kimdir kichik yoshdagi bolalarga g‘amxo'rlik qiladi, kimdir shunchaki cheksiz vazifalar va uy ishlari bilan band. Miya faoliyatini bir soat yoki kamida 20 daqiqa davomida to‘xtatish istagi bo‘lsa, buning har doim ham imkoni bo‘lmasligi mumkin, deb yozadi Lifehacker.

Biroq bu stress, xavotir va zo‘riqishlarga berilish kerak, degani emas. Kun davomida atigi bir necha daqiqa ruhiy salomatlikni saqlash, o‘zingizga e’tibor qaratishga, jismoniy tayyorgarlik, ichki holat va o‘zingizni yaxshi his qilishingizga yordam beradi. Buni sinab ko‘rish mumkin.

To‘g‘ri ovqatlanish

Ishda ko‘pincha to‘g‘ri ovqatlanish va zararli odatlar bilan kurashish unutiladi. Tubdan boshqacha usulni sinab ko‘rash mumkin — tushlik uchun vaqt ajratib, miyadan ish haqida eslatma va fikrlarni chiqarib tashlash kerak. Shoshilmaslik va taomdan zavqlanish uchun ushbu daqiqalardan foydalanish kerak. Bu ruhiy holatni qayta tiklashga va dam olishga yordam beradi.
 

Telefon va boshqa gadjetlarni bir chetga qo‘yishni unutmaslik lozim. Ko‘proq e’tiborni taomga qaratish kerak, sekin chaynang, ovqatni hidlang va tatib ko‘ring. Ideal holda, buni har ovqat paytida qilish kerak, ammo bunga vaqtingiz bo‘lmasa, hech bo‘lmasa nonushta uchun bunga vaqt ajrating.

Sayrga chiqish

O‘zingizni dam olishga va kun davomida tashqariga chiqishga majburlang. Tadqiqotlar shuni isbotlaydiki, piyoda yurish xavotirlanish darajasini pasaytiradi va kayfiyatni ko‘taradi. Bundan tashqari, xotirjam yurish his-tuyg‘ularga ijobiy ta’sir o‘tkazadi.

Agar faqat bir soatlik tushlik paytida yurish imkoniga ega bo‘lsangiz, unga 15-20 daqiqa ajrating. Natijada ovqatlanish va yana ishga tayyorlanish uchun ushbu vaqt kifoya.

Yaqinlar bilan muloqot qilish

Sevgan insoningizga qisqa xabar yuboring, tushlik paytida ota-onangizga qo‘ng‘iroq qiling yoki do‘stlarga SMS yozing. Yaqinlar bilan aloqa qilish oksitotsin gormoni darajasini oshiradi, bu esa stressni yengillashtiradi va o‘zingizni yaxshi his qilishga yordam beradi. Agar ofisda ishlasangiz, hamkasblar bilan suhbatlashing. Yoqimli muloqot endorfin va dofamin darajasini oshiradi, ular ham yaxshi kayfiyat uchun javob beradi.

Nafas olish uchun svetoforning qizil chirog‘idan foydalanish

Mutaxassislar avtomobil yoki avtobusda harakatlanayotgan paytda har bir bekatdan qisqa tanaffus sifatida foydalanishni maslahat beradi. Ishdan qanchalik kechikkanlik yoki sizni nima kutayotgani haqida o‘ylashning o‘rniga, dam oling.

Pastki jag‘ni bir oz pastga tushiring, yelkalarini ko‘taring, ularni orqaga qaytaring va asta-sekin asl holatga qayting. Beshgacha sanab chuqur nafas oling va yettigacha sanab nafas chiqaring. Bu amaliyot aqliy salomatlikni sezilarli darajada yaxshilaydigan foydali odatga aylanadi.

Fikr va tajribalarni yozish

Agar kun davomida fikrlar bir-birini odatdagidan tezroq almashayotganini sezsangiz yoki e’tiborni qaratish qiyin bo‘lsa, daftarni olib, aynan nima bezovta qilayotganini yozib oling. Bu shoshilinch ish vazifalari, yaqinlaringiz haqida tashvishlanish yoki shunchaki qayg‘uli fikrlar bo‘lishi mumkin.

Ushbu amaliyot miyaga samarasiz tashvishlardan xalos bo‘lish imkoniyatini beradi. Bundan tashqari, yozganlaringizni tashlab yuborish shart emas,  o‘zingiz ustida ishlash uchun ushbu eslatmalardan keyinroq foydalanishingiz mumkin.

Sevimli podkastni tinglash

Sevimli podkastni ish kunining oxirida yoki uyga qaytayotganda tinglang. Bu oila bilan uchrashishdan oldin kayfiyatni ko‘tarishga yordam beradi.

Ish kunini tugatish uchun marosim o‘ylab topish

Har kim ham ish va shaxsiy hayot o‘rtasida, ayniqsa, uydan ishlaganda aniq chegara qo‘yishga qodir emas. Kun oxirida ish rejimidan chiqishga yordam beradigan maxsus marosimni ixtiro qiling.

Ta’tilni rejalashtirish

Yetarlicha dam olishga ishonch hosil qilishning eng oson usuli bu kichik tanaffuslarni rejalashtirishdir. Kundalik jadvalga kamida bir necha daqiqani dam olish uchun qo‘shing.

Misol uchun, ertalab qo‘shimcha bir soat ajratib, uni butunlay o‘zingizga bag‘ishlang va ertangi kunga moslang. Yoki 11:00 dan 11:15 gacha bo‘lgan bo‘shliq bir piyola choy ichish va qisqa dam olish uchun ayni muddao deb qaror qiling. Mos keladigan usulni toping va o‘zingizni chalg‘itishga imkon bering.

Texnologiyadan foydalanishni cheklash

Keyingi safar sizga qisqa tanaffus kerak bo‘lganda, gadjetlarga qo‘l cho‘zmang. Buning o‘rniga daftar olib, o‘z fikrlaringizni yozing yoki telefon, noutbukni talab qilmaydigan sevimli mashg‘ulotingizni toping. Bu miyani qayta ishga tushirishga yordam beradi.

Mashq qilish

Jismoniy faollik har doim kerak, ayniqsa kompyuterda ko‘p vaqt o‘tkazadiganlar uchun. Ish jarayonida yoki oshxonada navbatda turganda ham organizm uchun foydali bo‘lgan yengil mashqlarni bajarish tavsiya etiladi. Vaqti-vaqti bilan stoldan turish, qo‘llarni oldinga va orqaga silkitish yoki barmoqlar poyabzalga yetguncha egilish.