Mitxun Chakraborti Toshkentda!!!

26.05.2013

3859

Уни Болливуднинг "тирик афсонаси” дейишади. У 400 дан ортиқ фильмларда суратга тушган... Ана шу "афсона”нинг ўзгинаси бугун Тошкентга учиб келди. Бугунги Якшанба тонги мана шундай ажойиб шов-шув билан бошланди.

Митхун Чакраборти Жимми билан "синоним” бўлиб кетган! "Диско раққоси”, "Ўйна, ўйна” – Митхуннинг "пасспорт” фильмлари. Ўз даврида миллионлаб қизларни ҳушидан оғдирган актёр бугун қарилик билан дўстлашган бўлса-да, барибир салобатли. Бошига қора шапкани бостириб, кўзига қора кўзойнак тақиб олган Жимми Тошкент халқаро аэропортидан Ватанимиз остонасига қадам қўяркан, тоза ҳаводан тўйиб-тўйиб нафас олиб, атрофга разм солди:

-Илк бора Ўзбекистонга 20 йилча олдин ташриф буюргандим. Қаранг, қанчалар катта ўзгаришлар. Тошкент янада чирой очган. Обод ва озода шаҳар. Очиғи, бу кунларни роса кутдим. Ахир, ўзбек ва ҳинд халқини азалий тарих боғлайди. Маданий қарашларимизда якдиллик бор. Ўзбекистон Ҳиндистоннинг энг яқин дўстларидан бири. Роосиянинг кўплаб шаҳарларида шоу тақдим этишим учун таклифлар бўлди. Таъбир жоиз бўлса, Россия ва қатор бошқа Марказий Осиё давлатларига аввал Ўзбекистонда гастролимни бошлаб кейин боришни ҳам қарзим, ҳам фарзим деб билдим. Шунинг учунми, ҳатто гонорар масаласи ҳам кейинги ўринда турибди!(кулади). Ўйлайманки, икки кунлик концерт дастуримизда Болливуднинг илиқ саломини етказамиз!

Митхун Чакраборти ёлғиз эмас. Шоуда унинг ёлғиз ўғли, Болливуднинг ёш юлдузларидан Мимоҳ Чакраборти ҳам иштирок этади. Меҳмонхонада ота-ўғилнинг сурати чизилган картина Мимоҳда катта таассурот қолдирди.

Мимоҳ Чакраборти:

-Отам туфайли шундай гўзал юртда меҳмонмиз. Ўзбекистон ҳақида кўп ўқиганман. Анча маълумотга эгаман.Бироқ, илк бора ташриф буюриб, барчасига ўз кўзим билан гувоҳ бўлиш бахтига муяссар бўлмоқдаман. Тассуротларимни ватанимга қайтгач, оила аъзоларим, дўстларим билан ўртоқлашаман. Жиммининг шунча мухлислари, дўстлари, ҳамкорларини кўриб ҳайратдаман. Қизиқ, олдинда бизни яна нималар кутмоқда?

Жасур Ҳамроев