iPhone 5s - 5 МИЛЛИОНДАН ОРТИҚ ИЛК ХАРИДОРЛАРИНИ КУТАДИ!

15.09.2013

3678

Cўнгги пайтда iPhone телефонларининг янги моделини кутиш одат тусига кирди. Iphone 5 s – энг узоқ кутилган русум бўлди. Токиода аллақачон Apple Store олдида "айфонмания”чилар учун ясама уйчалар қурилди. Париж, Нью-Йорк, Берлинда ҳам шунга яқинроқ аҳвол. Навбат учун харидорлар "жон”ини беришга тайёр. Уйқуси-ю ҳаловатидан воз кечиб, узун қаторда ўз навбати келишини сабр билан кутаётганларга қойил.

"Айфон 5” нега фақат 2 хил рангда? Бу зерикарли, дейдиганлар учун "Айфон”чилар "Айфон”нинг ранглар жилоси” ғояси остида турли ранглардаги "Айфон”ларни Iphone 5 c модели тарзида ишлаб чиқаришди. Ўзингизга ёққан рангдаги телефонни танлашингиз имконига эгасиз. Маълумотларга қараганда, харидорлар орасида энг машҳури – сариқ ранг бўлмоқда!

"Айфон” ишқибозлари, ашаддий мухлислари учун бошқа модел қизиқроқ. Ниҳоят, iPhone 5s  20 сентябрдан сотувга чиқарилади. АҚШда 16 ГБ хотиралик модел — 649 доллар,  32 ГБ — 749 доллар,  64 ГБ — 849 доллар. Тегишли операторлар билан икки йиллик шартнома тақдим этилса, юқоридаги нархлар пасаяди: 199, 299 ва 399 доллар.

Apple iPhone 5s учун махсус қобиқ ҳам тайёрлади. Энг қизиғи, улар олдингидек силикондан эмас, балки, теридан!  Аксессуар нархи — 39 доллар бўлиб, 6 хил рангда чиқарилади.

iPhone 5s нинг бошқа "қариндошлар”идан ажралиб турадиган хусусиятлари: камера 8 мп, бармоқ изларини сканерлаш ва IOS 7 дастури.

Ана шунақа гаплар! Ҳақиқий шов-шув 20 сентябрда кузатилади. Кутамиз.

Жасур ҲАМРОЕВ